രാഷ്ട്രവിരുദ്ധരുടെ വ്യാജപ്രചാരണങ്ങളിൽ വീഴാതെ ആർ.എസ്.എസിനെക്കുറിച്ച് അറിയാൻ പൊതുജനങ്ങൾ തയ്യാറാകണം: മനീഷ് പണിക്കർ
നാരംപാടി: രാജ്യത്തിന്റെ സംസ്കാരം സംരക്ഷിക്കുകയും പരിപോഷിപ്പിക്കുകയും ചെയ്യുന്നതിൽ രാഷ്ട്രീയ സ്വയംസേവക സംഘത്തിന്റെ (ആർ.എസ്.എസ്.) പങ്ക് വളരെ പ്രധാനപ്പെട്ടതാണെന്ന് പ്രശസ്ത തെയ്യം കലാകാരൻ മനീഷ് പണിക്കർ പറഞ്ഞു. സംഘത്തെക്കുറിച്ച് പുറത്തുനിന്ന് പ്രചരിപ്പിക്കുന്ന വ്യാജവിവരങ്ങൾ വിശ്വസിക്കാതെ, പൊതുജനങ്ങൾ സംഘത്തിന്റെ ചരിത്രത്തെയും പ്രവർത്തനങ്ങളെയും കുറിച്ച് മനസ്സിലാക്കാൻ ശ്രമിക്കണമെന്നും അദ്ദേഹം അഭിപ്രായപ്പെട്ടു.
രാഷ്ട്രീയ സ്വയംസേവക സംഘത്തിന്റെ പൈക മണ്ഡലത്തിന്റെ നേതൃത്വത്തിൽ സംഘടിപ്പിച്ച വിജയദശമി മഹോത്സവത്തിന്റെ ഭാഗമായി നടന്ന പഥസഞ്ചലനത്തിനു ശേഷം നടന്ന പൊതുസമ്മേളനത്തിൽ വിശിഷ്ടാതിഥിയായി പങ്കെടുത്ത് സംസാരിക്കുകയായിരുന്നു അദ്ദേഹം.
വിജയദശമി മഹോത്സവത്തിൽ പങ്കെടുക്കാൻ ക്ഷണം ലഭിച്ചപ്പോൾ, ഇതുവരെ സംഘവുമായി ബന്ധമില്ലാതിരുന്ന താൻ ആർ.എസ്.എസിനെക്കുറിച്ച് വിവരങ്ങൾ ശേഖരിക്കാൻ ആരംഭിച്ചുവെന്ന് അദ്ദേഹം പറഞ്ഞു. സംഘത്തെക്കുറിച്ച് പുറത്തു നടക്കുന്ന പ്രചാരണങ്ങളും സംഘത്തിന്റെ യഥാർഥ പ്രവർത്തനങ്ങളും തമ്മിൽ വ്യത്യാസമുണ്ടെന്ന് ഇതിലൂടെ മനസ്സിലാക്കാൻ കഴിഞ്ഞതായും അദ്ദേഹം വ്യക്തമാക്കി.
സംഘത്തിന്റെ ചരിത്രവും വിവിധ പ്രവർത്തനങ്ങളും പരിശോധിച്ചപ്പോൾ രാജ്യത്തിന്റെ പുരോഗതിയിൽ സംഘടനയുടെ സംഭാവനയുടെ പ്രാധാന്യം മനസ്സിലാക്കാൻ കഴിഞ്ഞു. മതത്തിന്റെ അടിസ്ഥാനത്തിൽ ഇന്ത്യക്കാരെ വേർതിരിക്കാതെ എല്ലാവരെയും ഒരുമിച്ചുകൊണ്ടുപോകാൻ ആർ.എസ്.എസിന് സാധിക്കുമെന്നും മനീഷ് പണിക്കർ അഭിപ്രായപ്പെട്ടു.
പരിപാടിയിൽ സംഘത്തിന്റെ ജില്ലാ സംഘചാലക് പ്രഭാകര മാസ്റ്റർ ബൗദ്ധിക് നടത്തി. കാസർകോട് ഖണ്ഡ് കാര്യവാഹക് സന്തോഷ് മന്നിപ്പാടി സന്നിഹിതനായിരുന്നു.
പൈക മണ്ഡൽ കാര്യവാഹക് അനിൽ ചിന്താനി സ്വാഗതം പറഞ്ഞു. ഹരീഷ് നാരംപാടി നന്ദി രേഖപ്പെടുത്തി.